అవతలి వాళ్లకు భయపడినట్లు నటిస్తూ, భయపెట్టేచోట భయపెడుతూ, బ్రతిమిలాడవలసిన చోట హుందాగా బ్రతిమిలాడుతూ, తమపనిని సక్రమంగా నడిపించుకోవడానికి, నానారకాలుగా మాట్లాడుతూ పబ్బం గడుపుకునే వాళ్ళని మనం చూస్తూ ఉంటాము. అలాంటి నక్క చేసే జిత్తులని ఈ కధలో చూద్దాం.
ఒక కీకారణ్యంలో, మహాచతురకుడు అనే నక్క వుండేది.
అది ఒకరోజు, అడవిలో పోతూవుండగా, చనిపోయి పడివున్న పెద్దఏనుగును చూసింది. వెంటనే దానికి ఏనుగు మాంసం తినాలనే వూహరాగానే, నోరు వూరింది. చెంగున గెంతి, ఆ యేనుగుమీద పడి గోళ్ళతో దాని పైచర్మాన్ని చీల్చాలని ప్రయత్నించింది. అయితే ఏనుగు చర్మం మందం గా వుండడం వలన, దాని గోళ్ళతో దానికి ఏనుగు చర్మం చీల్చడం సాధ్యం కాలేదు. ' ఏదైనా పెద్దజంతువు వస్తుందేమో, దాని సహాయంతో ఈ ఏనుగు మాంసం ఆరగించాలి. ' అని నక్క అనుకున్నది.
ఇంతలో అటుగా మృగరాజు సింహం వచ్చింది. దానిని చూడగానే, వినయంగా నక్క, ముందరి కాళ్ళు రెండూ నేలమీద ముందుకు చాచి, అభివాదం చేస్తూ, ' ప్రభూ ! తమకోసమే ఈ ఏనుగు కళేబరానికి కాపలా కాస్తున్నాను. తమరు వచ్చారు. నాకు సంతోషంగా వున్నది. మీరు ఈ ఏనుగు మాంసం ఆరగించండి. తాము తిన్న తరువాత మిగిలినది, ఈ భృత్యుడు తింటాడు. ' అని అతివినయంగా సింహం తో చెప్పింది.
మృగరాజు నక్క మాటలకు సంతోషించి, ' నాగురించి నువ్వు ఆలోచించినందుకు ధన్యవాదాలు. అయితే, ఎవరో చంపిన జంతువును నేనుతినను అని నీకు తెలుసుకదా ! నీవే దీనిని బహుమతిగా నావద్దనుండి తీసుకో ! విందారగించు. ' అని చెప్పగా, నక్క ' ధర్మ ప్రభువులు. ' అని పొగిడి దానిని పంపివేసింది.
ఇంకొద్ది సేపటికి, చిరుత ఒకటి అటుగా వచ్చింది. ' దానిని ఎలా వెళ్ళగొట్టాలా ' అని ఆలోచిస్తూ నక్క, ' వినయంతో సింహాన్ని పంపించాను, దీనికి ఏవిధమైన లంచం యిచ్చి పంపలేను. ఏదైనా కుటిలోపాయంతో, ఈ చిరుతను పంపించివేయాలి. ఎన్ని సుగుణాలు వున్న ధైర్యవంతుడినైనా, కుటిలత్వంతో జయించవచ్చు. ' అని మనసులో అనుకుని, లేని ధైర్యం నటిస్తూ, ' మామా ! ఇదిగో చూడు ! ఈ ఏనుగును మృగరాజు చంపి స్నానం చెయ్యడానికి వెళ్ళింది. దాని కోసం నేను ఇక్కడ కాపలాగా వున్నాను. ఎందుకు అనవసరంగా మృత్యువును కొనిదెచ్చుకుంటావు ? వెళ్లే ముందు నన్ను కాపలాగా వుంచి ఏదైనా చిరుతపులి వస్తే తనకు కబురు చెయ్యమని చెప్పింది. తాను వచ్చి ఈఅడవిలో యెక్కడా చిరుతపులి అనేది లేకుండా చేస్తానని చెప్పింది. ' అని లేనిపోనివి కలిపించి చెప్పింది.
నక్క మాటలకు చిరుత భయపడి, ' అల్లుడా ! నన్నూమాజాతినీ రక్షించు. నేను ఇటు వచ్చినట్లు చెప్పబోకు. ' అని బ్రతిమిలాడి అక్కడినుంచి పరుగు చిత్తగించింది. ' అమ్మయ్య ' అని, నక్క, ఊపిరి పీల్చుకుంటుండగా, పెద్దపులి అటుగా వచ్చింది. వెంటనే వేగంగా నక్క బుర్ర పని చేయసాగింది. ' ఇలా నేను ఎంతమంది నుండి, ఈ ఏనుగు మాంసాన్ని కాపాడగలను ? ఒక పనిచేస్తాను. దీనికోరలు చాలా వాడి అయినవి కదా ! దీని చేత ఏనుగు చర్మాన్ని వలిపించే ఏర్పాటు చేసుకుంటాను. ' అని అనుకున్నది.
అనుకున్నదే తడవుగా, ' అల్లుడూ ! పులిరాజా ! ఏమిటి ఈమధ్య యెక్కడా కనబడడం లేదు. చూస్తుంటే చాలా ఆకలిగా వున్నట్లున్నావు. నువ్వు నా అతిధివి అనుకో ! ఒకసింహము ఈ ఏనుగును చంపి నన్ను కాపలాగా పెట్టింది. అయినా నువ్వు నాకు కావలసిన వాడివి కదా. నీకు కావలసినంత ఆరగించు. భయపడవద్దు. నేను దూరంగా వుండి చూస్తుంటాను. సింహం వస్తుండగా నీకు సంకేతం ఇస్తాను. తిన్నంత తిని పారిపో ! ' అని చెప్పింది.
పెద్దపులి భయపడుతూనే, ఏనుగు వద్దకువెళ్లి, దాని చర్మాన్ని క్షణాలలో చీల్చి మాంసం తినసాగింది. ఇదంతా దూరంగా గమనిస్తున్న నక్క, పెద్దపులి ఎక్కువ మాంసం తినడానికి అవకాశం ఇవ్వకుండా, ' అల్లుడూ ! త్వరగా పారిపో . సింహం వచ్చేస్తున్నది. ' అని గట్టిగా కేకపెట్టింది. అది వినగానే, పులి కాలికి బుద్ధి చెప్పింది.
ఇక, ' అమ్మయ్య ఈ మాంసమంతా నేనే తినవచ్చు. ' అని ఆనందంగా ఏనుగుపైకి నక్క ఎగబాకుతుండగా, ఎక్కడినుంచో, వేరొక నక్క వచ్చింది, పోటీగా తినడానికి. ఆ వచ్చింది నక్క అయినా, తన జాతి వాడైనా, దానిని ఎదిరించే సత్తా వుండడం వలన, దానికి పిసరంత అయినా విందు దొరకకుండా, తరిమి తరిమి కొట్టింది.
ఆ విధంగా ఏనుగు మాంసాన్ని తాను ఒక్కతే, ఎన్నో రోజులు ఆనందంగా ఆరగించింది.
చూసారా ! అవే నక్కజిత్తులంటే. తగ్గివుండవలసినచోట తగ్గివుండి, సహాయం పొందవలసినచోట లౌక్యంగా సహాయం పొంది, సహాయం చేసినవాడికి కృతజ్ఞత చూపించకుండా, తాను భయపడవలసిన అవసరం లేని చోట వీరత్వం చూపించి, తన పని నెగ్గించుకుంది మహాచతురకుడు అనే నక్క.
ఈ రోజుల్లో లౌక్యం అనే ముసుగులో, ఇవేతెలివితేటలు అనే పరిభాషలో, యిలాంటి మోసాలు చేసేవాళ్ళు చాలామంది వుంటారు. తస్మాత్ జాగ్రత్త !
Source: Gandavarapu Prabhakar Garu
(Facbook)
No comments:
Post a Comment