ఆదిపర్వం. చతుర్దాశ్వాసం.
సౌతి శౌనకాది మహామునులకు చెబుతున్నాడు.
మాండవ్యముని కోపించి, కంపిస్తున్న కంఠంతో, యమధర్మరాజుతో, ' యమా ! పధ్నాలుగు సంవత్సరాలు వచ్చేవరకు ఏ వ్యక్తిని అయినా బాలుడు అనే అంటారు. అప్పటివరకు ఆ బాలుడు చేసిన నేరాలకు అతనిని శిక్షించకూడదని ధర్మ శాస్త్రాలు చెబుతున్నాయి కదా ! అటువంటి బాలునికి నేరం ఆపాదించి శిక్షించే వారే నేరస్తులు అవుతారు. నీవు ఈ ధర్మాన్ని విస్మరించి పాపం చేసావు. కాబట్టి మువ్వు భూలోకంలో శూద్రవనితకు జన్మించు. ' అని శాపం ఇచ్చాడు.
అందువల్లనే విదురుడుగా యమధర్మరాజు పుట్టవలసి వచ్చింది. ' అని జనమేజయునకు వైశంపాయనుడు చెప్పాడు.
ఆదిపర్వం చతుర్దాశ్వాసం సమాప్తం.
ఆదిపర్వం- పంచమాశ్వాసము ప్రారంభం.
ఇక ధృతరాష్ట్రుడు, పాండురాజుల విషయానికి వస్తే, వారు రాజవిద్యలన్నింటిలో ఆరితేరారు. బీష్ముడి పాలనలో కురు రాజ్యం లో ధర్మం చక్కగా పరిరక్షించ బడుతున్నది. ప్రజల జీవన ప్రమాణాలు పెరిగాయి. వర్షాలు సకాలంలో కురుస్తున్నాయి. పంటలు సమృద్ధిగా పండుతున్నాయి. వృక్షసంపద, గోసంపద వృద్ధి అవుతున్నది. శిశుమరణాలు తగ్గాయి.
ఇలా దేశం సుభిక్షంగా వున్న సమయంలో, భీష్ముడు ధృతరాష్ట్రునికి వివాహం చేయ సంకల్పించి, గాంధార రాజైన సుబలుని కుమార్తె గాంధారీ దేవి, అందమైనదనీ, ఆమె జాతకంలో, నూరుగురు పుత్రులు, ఒకకుమార్తె కలిగే సంతానయోగం వున్నదని తెలుసుకుని, ఆవిషయం విదురునితో చెప్పాడు. విదురుడు కూడా ' ఈ ఆలోచన యెంతో బాగున్నది. ' అని అన్నాడు.
సుబలుడు, తనకుమార్తె కురువంశ పట్టమహిషిగా స్థానం సంపాదిస్తుందని, అంధుడైనా ధృతరాష్ట్రునికి గాంధారిని యివ్వడానికి సమ్మతించాడు. గాంధారి కూడా, బంధువుల యెగతాళి మాటలు భరించలేక, రోషంగా, తాను కూడా చూపును త్యాగం చేసి, భర్తతో పాటు అంధత్వం స్వీకరిస్తానని, ప్రతిజ్ఞ చేసింది. కళ్ళకు గంతలు కట్టుకున్నది.
వివాహం అయిన తరువాత, శకుని, గాంధారి సోదరుడు అనేక విలువైన బహుమతులను పట్టుకుని గాంధారితో సహా హస్తినాపురానికి వచ్చాడు.
ధృతరాష్ట్రుడు గాంధారితో పాటు ఆమె చెల్లెళ్ళు పదిమందిని కూడా వివాహం చేసుకున్నాడు. ఈపదిమందినే కాకుండా, మరో నూరుగురు కన్యలను భీష్ముడు ఎంపిక చెయ్యగా, వారిని కూడా ధృతరాష్ట్రుడు వివాహమాడాడు. మొత్తం కలిపి అంధుడైన ధృతరాష్ట్రునికి నూట పదకొండుమంది భార్యలైనారు, గాంధారితో సహా.
ఇప్పుడు పాండురాజు సంగతి చూద్దాం. పాండురాజు వేదవేదాంగాలన్నీ అభ్యసించి, క్షత్రియ విద్యలు కూడా నేర్చుకుని, అన్నింటిలో అసమాన శూరుడయ్యాడు. అతనికి కూడా వివాహం చెయ్యాలని భీష్ముడు సంకల్పించి, విదురునితో తగిన వధువు గురించి ఆలోచనలు చేసాడు.
యాదవవంశ మహారాజు అయిన శూరుడు అనే ఆయన పెద్దకుమార్తె పృధ. అయితే, శూరుని మేనబావ అయిన కుంతిభోజునికి సంతానం లేకపోవడంతో పృధను ఆయనకు దత్తతగా ఇచ్చాడు. పృధ కూడా కుంతిభోజుని స్వంతతండ్రిలాగానే చూసుకునేది. అప్పటినుండి ఆమె కుంతీదేవిగా పిలువబడసాగింది.
ఇంటికి వచ్చిన అతిధుల ఆలనా పాలనా అంతా ఆమే చూసుకునేది. వారిని యెంతో మర్యాదగా ఆహ్వానించి పూజలు జరిపి, వారికి కావలసినవి అన్నీ సమకూర్చేది. ఆ సమయంలో ఒకరోజు దుర్వాస మహాముని, అతిధిగా కుంతిభోజుని రాజ్యానికి రాగా, కుంతి ఆయనకు దగ్గరగా వుండి విశేష పూజలు జరిపి, ఆయన అభిమానం చూరగొన్నది. దుర్వాసుడు యెంతో సంతోషించి, ఆమె సేవలకు ప్రతిఫలంగా ఆమె అడగకుండానే, ఒక మంత్రం ఉపదేశించి, ' ఓ కన్యామణీ ! ఈ మంత్రం స్మరించి నీవు ఏ దేవతను ఆహ్వానిస్తావో, ఆదేవత ప్రత్యక్షమై, నీకు అప్పటికప్పుడు ఒకపుత్రుడిని ప్రసాదిస్తాడు. ఇది నీ భావి జీవితానికి యెంతో ఉపయోగపడుతుంది. ' అని చెప్పి వెళ్ళిపోయాడు.
అయితే, ఒకరోజున కుంతీదేవి గంగానదీ స్నానానికి వెళ్లి, బాల్యచేష్టగా, దుర్వాసుని మంత్రమహిమ పరీక్షించాలనే కోరికతో, యెదురుగా కనబడుతున్న కర్మసాక్షి సూర్యభగవానుని ముందు నిలబడి, ఆ మంత్రం పఠించింది. ' నాకు నీలాంటి తేజోవంతుడైన కుమారుడిని ప్రసాదించు. ' అని ప్రార్ధించింది.
వెంటనే సూర్యభగవానుడు ప్రత్యక్షమై. ఎదుట నిలవగానే, ఆమె భయపడిపోయింది. ఆమెకు అభయమిస్తూ, ' బాలికా ! నేను నీకు కుమారుడిని ప్రసాదించడానికి వచ్చాను. దీనివలన నీ కన్యత్వానికి ఏమీ భంగము వాటిల్లదు. ' అన్నాడు. ఆమె అనేకవిధాల బ్రతిమాలి తిరిగిపొమ్మని చెప్పింది. తన అజ్ఞానానికి మన్నించమన్నది. సహజమైన ఉబలాటంతో చేసిన బాల్యచేష్టగా పరిగణించి, తన తప్పును కాయమన్నది. నేను తల్లినైతే లోకం నవ్వదా ? ' అని వణికిపోయింది.
కానీ, సూర్యభగవానుడు, తాను వచ్చిన తరువాత వెనుకకు వెళితే, మంత్రాన్ని, మంతం ప్రసాదించిన మహర్షిని కించపరచినట్లు అవుతుందని, ఆమె మీద దయతో, ' నీకు పుట్టే కుమారుడు సద్యోగర్భంలో పుడతాడు. దీనివలన నీ కన్యత్వానికి ఎట్టి దోషం కలుగదు. ' అని చెప్పి ఆమెకు ఒకపుత్రుని ప్రసాదించాడు. ఆ బాలుడు సహజ కవచకుండలతో పుట్టి సూర్యబింబ౦ లాగా మెరిసిపోతున్నాడు.
సూర్యభగవానుడు వెళ్లిపోయిన తరువాత, ఆ తేజోమూర్తిని దగ్గర పెట్టుకోలేక, దూరంగా వదలలేక మానసిక వేదన అనుభవించింది ముక్కుపచ్చలారని కుంతీదేవి. ఆమె తనలో, తాను కుమిలిపోతూ ఏదో అనుకుంటున్నది.
Source: Gandavarapu Prabhakar Garu
(Facbook)
No comments:
Post a Comment