వ్యర్ధమైన వరం.

వెనకటికెవరో ఒక అమాయకుడు, భగవంతుడు ప్రత్యక్షమై, ఏం వరం కావాలో కోరుకొమ్మంటే, ' మా మేనమామ చెవులలో జుట్టు మొలిపించు, స్వామీ ' అని అడిగాడట. అలాంటి అమాయకుడి గురించిన పంచతంత్ర కథ ఇది. 

ఒకానొక వూళ్ళో ' మందరకుడు ' అనే సాలెపని చేసే నేతగాడు వుండేవాడు. ఒకసారి అతను బట్టలు నేస్తుండగా మగ్గంపై వుండే చెక్క విరిగిపోగా, చెక్క కొట్టుకొందామని అడవికి వెళ్ళాడు. వెళ్లినవాడు, మళ్ళీమళ్ళీ రాకుండా, ఒకపెద్దచెక్కను తీసుకు వెళదామని, ప్రక్కన వున్న చెట్టుని గొడ్డలితో కొట్టబోతుండగా, ఒక యక్షుడు, చెట్టుపై నుండి, పెద్దగా కేకపెట్టాడు, ' ఓ నేతగాడా ! ఇదినాకు యిల్లులాంటిది. దీనిని యేమీచేయకు. నేను చల్లగాలి అనుభవిస్తూ, యీచెట్టుమీద యెంతో హాయిగావున్నాను. ' అన్నాడు.

ఆ మాటలకు మందరకుడు ఆశ్చర్యపడి, ' అయ్యా ! తమరెవరో, దేవతలాగా వున్నారు. ఈ చెక్క తీసుకువెళ్లకపొతే, నా మగ్గంపని ఆగిపోతుంది. మేము మాకుటుంబం అంతా ఆకలితో అలమటించాలి, కాబట్టి అడ్డుచెప్పవద్దు. తమరే యింకేదైనా చోటు చూసుకోండి. ' అని వినయంగా వేడుకున్నాడు.

అతను సమాధానం చెప్పిన విధానానికి సంతసించి, యక్షుడు, ' సరే ! నీబాధ నాకు అర్ధం అయింది. నీకు మళ్ళీమళ్ళీ యిలాంటి శరీరకష్టం లేకుండా యేదైనా ఒకవరం యిస్తాను, కోరుకో ! ' అని యెంతో కరుణతో అన్నాడు. దానికి మందరకుడు సంతోషించి, ' నేను నాభార్యకు చెప్పకుండా యిలాంటినిర్ణయాలు తీసుకోలేను. దయచేసి ఒక్కరోజు గడువుయివ్వు. యింటికివెళ్లి నాభార్యను సంప్రదించి వస్తాను. ' అని ఇంటికి బయలుదేరాడు. 

అప్పుడు యక్షుడు ఆ నేతగానిని వెనుకకు పిలిచి, ' మందరకా ! ఒక్క షరతు. ఒక్క వరమే యిస్తాను. బాగా ఆలోచించుకుని రా ' అని చెప్పాడు. .

యక్షుని మాటకు సరే అనిచెప్పి, మందరకుడు, దారిలో, తనస్నేహితుడు క్షురకవృత్తి చేసేవాడు కనబడితే, సంతోషం పట్టలేక, విషయం అంతా చెప్పాడు. ' నాభార్య సలహా కోసం వెళ్తున్నాను. ' అనికూడా అన్నాడు. 

దానికి అతని స్నేహితుడు, ' మిత్రమా !ఇలాంటి విషయాలలో భార్యల సలహాలు యేమూర్ఖుడూ తీసుకోడు. ఆమెకు యివ్వాలనుకుంటే, చక్కటి చీరలు, నగలు, ఆభరణాలు మంచి యిల్లు ఇవ్వు. . ఆమె సంతృప్తి చెందుతుంది. అంతే కానీ, మొత్తంవిషయంలో సలహా అడగవద్దు. నేను రాజుల వైభోగం చూస్తూవుంటాను, వాళ్ళ దగ్గరకు, వృత్తిరీత్యా వెళ్ళినప్పుడు. ఎంతో గొప్పగా వుంటుంది. నామాట విని యేదైనా రాజ్యం కావాలని కోరుకో, నీకష్టాలు గట్టెక్కుతాయి. నన్నుమంత్రిగా పెట్టుకో, ఇలాంటి సలహాలు బోలెడుయిస్తాను. ' అని చెప్పాడు.

అయితే, మందరకుడు దీనికి వప్పుకోకుండా, తాను అనుకున్న ప్రకారం, యింటికి వెళ్లి జరిగినది అంతా పూసగ్రుచ్చినట్లు భార్యకుచెప్పి, తన స్నేహితుని సలహా కూడా చెప్పాడు. దానికి అతని భార్య ' నీ స్నేహితుడు యెంత తెలివితక్కువ వాడు. ఇలాంటి విషయాలలో, భార్యసలహాని తీసుకోవాలి. ఇంకెవ్వరూ పనికిరారు. రాచరికంలో యెన్నో బాధ్యతలు వున్నాయి. కుట్రలు ఉంటాయి. దాని వల్లనే కదా శ్రీరాముడు అడవులకు వెళ్ళాడు. పాండవులు వనవాసం వెళ్లారు. యాదవులు నశించారు, నలమహారాజు అడవులపాలు అయ్యాడు. ఇన్ని తెలిసీ యెవరైనా రాజ్యం కోరుకుంటారా ! అలాంటి చెత్త ఆలోచనలు చెయ్యకు. ' అని గట్టిగా చెప్పింది. 

' అయితే, నీ సలహా యేమిటో చెప్పు, ' అన్నాడు మందరకుడు సాలోచనగా. దానికి అతని భార్య ' అలా అడిగావు బాగుంది. నువ్వు బట్టలు నేయడానికి యెంతో కష్టపడుతున్నావు. అయినా మనకు కడుపునిండా తిండి దొరకడంలేదు. అదే నీకు గనుక యింకో రెండు చేతులు, యింకొక తలకాయవుంటే, యింతకు ఇంత సంపాదించవచ్చు. కుటుంబాన్ని సంతోహంగా వుంచవచ్చు. కాబట్టి యక్షుడిని, యింకో ఆలోచనలేకుండా, రెండో తలా, రెండు చేతులు అదనంగా కోరుకో ! మనము అధిక సంపాదనతో సుఖపడదాం ! ' అని అద్భుతమైన సలహా యిచ్చింది.

మందరకునికి యీ సలహా యెంతో నచ్చి, అదేవిధంగా యక్షుడిని అడిగి వరం పొంది, రెండు తలలతో, నాలుగు చేతులతో నగరం లోనికి ప్రవేశించాడు. ఇంకేముంది, యీ వింత ఆకారం చూడగానే కుక్కలు వెంటబడి తరమసాగాయి. అడవిలో నుంచి నక్కలు ఊళలు వేయసాగాయి. గ్రామస్థులు, యేదో వింతరాక్షసి వచ్చిందని రాళ్లు వేయసాగారు.

ఈ పరిస్థితి వూహించని మందరకుడు, వేగంగా యింట్లొకి వెళ్లి తలుపులు వేసుకున్నాడు. రాక్షసి ఆయింట్లో దూరిందని, వూరివారు గొడవచెయ్యడం ప్రారంభించారు. ఇక చేసేది లేక, ఆ వింత శరీరంతో మందరకుడు బైటకువచ్చి, జరిగిన సంగతి వివరించగా, వెంటనే, వూరి పెద్దలు, ఆశ్చర్యంతో నోళ్లు వెళ్ళబెట్టారు. 

తరువాత తేరుకుని, వూరిపెద్దలు అతనిని, అతనిభార్యనూ, చివాట్లుపెట్టి, యిద్దరినీ కలిపి, యక్షునివద్దకు వెళ్లి మామూలు రూపం యిప్పించమని అడిగి రమ్మన్నారు. మందరకుని భార్య తన సలహా వలన యిదిజరిగిందని, తప్పు వప్పుకుని, తనభర్తకు తిరిగి మామూలు రూపం ప్రసాదించమని యక్షుని వేడుకున్నది.
యక్షుడు అందుకు అంగీకరించి, మందరకునికి మామూలు మనిషి రూపం వచ్చేటట్లు చేసి, వేరే వరం కోరుకోవడానికి,వారికి అర్హతలేదని చెప్పి, చెట్టుమీదనుండి మాయమయ్యాడు.

బిక్కమొహాలతో ఆ అమాయకపు భార్యాభర్తలు ఇంటిదారిపట్టారు. అందలం యెక్కించాలన్నా, అందుకు అర్హులుకాకపొతే, అందుకోలేరని తెలిపే కథ, యిది.

Source: Gandavarapu Prabhakar Garu

(Facbook)